Main Menu

நேர்காணல்

பட்டதாரிக நியமனங்கள் இரத்து : திட்டமிடப்பட்ட செயற்பாடு – பாதிக்கப்பட்ட பட்டதாரிகள் ஒன்றியத்தலைவர் நூறுள் ஹுதா உமர்

(எஸ்.அஷ்ரப்கான்) பட்டதாரிகளுக்கான நியமனங்கள் வழங்கப்பட்டதும் அதே வேகத்தில் நிறுத்தப்பட்டதும் திட்டமிடப்பட்ட செயற்பாடா? என்ற சந்தேகத்தை ஏற்படுத்துகிறதென்று அம்பாறை மாவட்ட பாதிக்கப்பட்ட பட்டதாரிகள் ஒன்றியத்தின் தலைவர் நூறுள் ஹுதா உமர் தெரிவித்தார்.

மாளிகைக்காட்டில் நேற்று (06) ஊடகவியலாளர் ஒருவர் எழுப்பிய கேள்விக்குப் பதிலளித்து உரையாற்றும் போது தெரிவித்தார்.

அவர் இது விடயமாக மேலும் குறிப்பிடும் போது, பட்டதாரிகள் நியமனத்திற்கும் தேர்தலுக்கும் எந்தவொரு தொடர்பும் கிடையாதென்று முன்பு கூறப்பட்டது. இன்று முறைப்பாடுகள் கிடைக்கப்பட்டதென்றும், தேர்தலை மையப்படுத்தி நியமனங்கள் வழங்குவதால் இரத்துச்செய்வதாக தேர்தல் ஆணையாளரால் அறிவிக்கப்பட்டுள்ளது. இதில் எழுகின்ற கேள்வி அழுத்தங்கள் கொடுக்கின்ற பட்சத்தில் தேர்தல் சட்டங்கள் மாறுபடுமா?

அத்துடன், 28 கடிதங்கள் நியமனத்தைத்தடுக்கக் கோரி வழங்கப்பட்டதாகக் கூறப்பட்டது. இதனை வழங்கிய அரசியல் கட்சிகள் யார்? என்பதை தேர்தல் ஆணைக்குழு இலங்கை வேலையில்லாப்பட்டதாரிகளுக்கு வெளிப்படுத்த வேண்டும். படித்த சமூகத்தின் நியமனத்தைத் தடுக்கின்ற இவ்வாறான அரசியல்வாதிகள் பெயர்கள் வெளிப்படுத்த வேண்டும்.

இதற்கு கடந்த அரசு இருக்கும் போது வழங்கப்பட்ட செயற்றிட்ட உதவியாளர் நியமனம் தடுக்கப்பட்டதென காரணங்காட்டி இந்த நியமனத்தினையும் தடுக்கின்றனர். செயற்றிட்ட உதவியாளர் என்பது UNP அரசு உருவாக்கிய நியமனம். பட்டதாரிகள் நியமனம் தொடர்ந்து காலா காலமாக வழங்கப்படும் வேலைவாய்ப்பு. அரசாங்கம் மாற்றமுற்றாலும் தொடர்ந்து வழங்கப்படும் பட்டதாரிகள் நியமனத்துடன் செயற்றிட்ட உதவியாளர் நியமனத்தை ஒப்பிட்டு இதனைத்தடுப்பது ஏற்றுக்கொள்ள முடியாத செயலாகும்.

நியமனக்கடிதங்களை வழங்கி அதனைத்தடுப்பது பட்டதாரிகள் மத்தியில் பெரும் உளவியல் ரீதியான தாக்கத்தினை உண்டு பண்ணியுள்ளது. பட்டதாரிகளை இந்த அரசாங்கம் ஏமாற்றியுள்ளதென சஜித் பிரேமதாச ஊடக சந்திப்பில் கூறியிருந்தார். கடந்த ஐக்கிய தேசியக்கட்சி அரசாங்கத்திலே தான் பட்டதாரிகளை உள்வாரி, வெளிவாரி,  HNDA எனவும், வயது அடிப்படையிலும் பிரித்து ஓரங்கட்டப்பட்டது. தற்போதைய அரசு எந்தவொரு பாகப்பிரிப்பும் இல்லாமல் நியமனத்தை வழங்கியது.

நியமனம் இரத்தானதற்கு எதிர்க்கட்சியே காரணம். எதிர்க்கட்சியினர் பிள்ளையையும் கிள்ளி விட்டு தொட்டிலையும் ஆட்டுகின்றனர். உங்களது அரசியல் சுயநலத்திற்காக கஷ்டப்படும் பட்டதாரிகளை பயன்படுத்தாதீர்கள்.

கடிதங்கள் ஸ்பீட் போஸ்ட்டில் அனுப்பப்படுகின்றதெனக் கூறப்படுகிறது. ஆமை வேகத்தை விட குறைவான வேகத்திலேயே கடிதங்கள் வருகிறது. அதனால் கடிதங்கள் அனுப்புகின்ற முறைமையினையும் அரசு தெளிவுபடுத்த வேண்டும்.

தலைமைகளோ முன்னாள் பாராளுமன்ற உறுப்பினர்களோ இது பற்றி கதைக்கவில்லை. இனியும் கதைக்க இவர்கள் தேவையில்லை.

மேலும், தேர்தல் காலங்ககளில் நியமனங்கள் வழங்க முடியாதென்பது ஜனாதிபதி கோட்டாபய மற்றும் பிரதமர் மஹிந்த ராஜபக்ச போன்றோருக்கு முன்பு தெரியாதா? இதிலும் எங்களுக்கு சந்தேகம் தோன்றுகின்றது. எது எவ்வாறு இருப்பினும் எங்களுக்கு தலைமைத்துவப் பயிற்சியாவது பெற்றுத்தர வேண்டுமெனக் கேட்டுக்கொள்கின்றோம் என்றார்.