Main Menu

விளையாட்டுச் செய்திகள்

மீராவோடை ஹிதாயா விளையாட்டுக்கழகத்தின் முன்மாதிரி

மீராவோடை யாஸீன் மீராவோடை ஹிதாயா விளையாட்டுக்கழகத்தினால் முதற்கட்டமாக ஐம்பது குடும்பங்களுக்கு அத்தியாவசியப் பொருட்கள் அடங்கிய உலருணவுப்பொதிகளை வழங்கி தமது முன்மாதிரிகளை வெளிக்காட்டியுள்ளனர்.

நீண்ட காலமாகச் செயற்பாடின்றிக் காணப்பட்ட இப்பிரதேசத்தின் மிகப்பழமை வாய்ந்த மீராவோடை ஹிதாயா விளையாட்டுக்கழகம் அண்மையில் புனர்த்தானம் செய்யப்பட்டதுடன், மீள் ஆரம்பத்தைச் சிறப்பிக்குமுகமாக கரப்பந்தாட்ட சுற்றுப்போட்டியொன்றை நடாத்த திட்டமிட்டு அதற்கான பூர்வாங்க ஏற்பாடுகள் பூர்த்தியான நிலையில், மிக வேகமாகப் பரவி வரும் கொரோனா வைரஸ் தொற்று நோயின் தாக்கம் காரணமாக குறித்த போட்டி பிற்போடப்பட்டது.

இருப்பினும், அதற்காக ஒதுக்கீடு செய்த நிதியினை தொடர்ச்சியாக அமுல்படுத்தப்பட்டு வரும் ஊரடங்குச்சட்டத்தினால் பாதிக்கப்பட்டுள்ள கூலித்தொழிலாளிகளுக்கு உதவத் தீர்மானிக்கப்பட்டு குறித்த உலருணவுப் பொதிகள் வழங்கி வைக்கப்பட்டது.கழகத்தின் முன்மாதிரி நடவடிக்கை பாராட்டுக்குரியது.

வருவாய் இழந்து கடும் பொருளாதாரச்சிக்கலில் தவித்துக்கொண்டிருக்கும் ஏழைகளுக்கு இவ்வேளையில் பல அமைப்புகளும் தனவந்தர்களும் தம்மாலான உதவிகளை வழங்கி வரும் நிலையில், இச்சூழலைக் கருத்திற்கொண்டு மீராவோடை ஹிதாயா விளையாட்டுக்கழகத்தினால் முதற்கட்டமாக ஐம்பது குடும்பங்களுக்கு அத்தியாவசியப்பொருட்கள் அடங்கிய உலருணவுப்பொதிகள் வழங்கத்தீர்மானிக்கப்பட்டதுடன், இரண்டாம் கட்டமும் ஆரம்பிக்கப்படவுள்ளது.

கழகம் வெறும் விளையாட்டுடன் மாத்திரம் மட்டுப்படுத்தப்படாமல், எதிர்வரும் காலங்களில் மேலும் பல சமூக சேவைகளை மையப்படுத்தி இயங்க வேண்டுமென்பதில் கழக அங்கத்தவர்கள் உறுதியோடுள்ளனர்.