Main Menu

சர்வதேசம்

அல்-கொய்தாவின் நகர்வும் : சோவியத்தின் வீழ்ச்சிக்கு வித்திட்ட அமெரிக்காவின் அல்-குர்ஆன் விநியோகமும்

முப்பத்தியோராவது தொடர்.

முகம்மத் இக்பால் - சாய்ந்தமருது சூடான் நாட்டில் அமெரிக்காவின் எதிரியான ஒமர் அல்-பஷீரின் ஆட்சி பாதுகாப்பானதாகவும், தனது அல்-கொய்தா இயக்கப்போராளிகளுக்கு பயிற்சி வழங்குவதற்கு உகந்த தளமாகவும் இருந்தது. அதனாலேயே சவூதியிலிருந்து விரட்டப்பட்ட பின்பு ஒசாமா பின் லேடன் சூடானில் தஞ்சமடைந்தார்.

அங்கு ஏற்கனவே வசித்து வந்த எகிப்தைச்சேர்ந்த ஜிகாத் அமைப்பின் உறுப்பினர்கள் மற்றும் ஆபிரிக்கா கண்டத்தைச்சேர்ந்த பல இயக்கங்களை அல்-கொய்தாவுடன் இணைத்தார். இதனால் ஒசாமாவுக்கு ஆதரவு வழங்கி வந்த எகிப்தின் ஆட்சியாளர்களும் எதிரியாக மாறினார்கள்.

அத்துடன், உலகம் முழுவதிலுமிருந்தும் போராளிகள் அழைத்து வரப்பட்டு சூடானில் பயிற்சி வழங்கப்பட்டது. பின்பு அங்கிருந்து உலகின் பல பாகங்களுக்கும் அல்-கொய்தாவின் தாக்குதல்கள் விஸ்தரிக்கப்பட்டது.

1998.08.07 இல் கென்யா, தன்சானியா ஆகிய நாடுகளின் தலைநகர்களில் அமைந்திருந்த அமெரிக்கத் தூதரகங்கள் மீது அல்-கொய்தா இயக்கத்தினரால் ஒரே நேரத்தில் குண்டுதாக்குதல் நடாத்தப்பட்டது. இதனால் தூதரகம் சேதமடைந்ததுடன், ஏராளமான அமெரிக்கத்தூதரக அதிகாரிகள் கொல்லப்பட்டனர்.

இந்தத்தாக்குதல் மூலம் ஒசாமா தீவிரமாகத் தேடப்படும் நபராக அமெரிக்கா அறிவிப்புச்செய்தது. பின்பு அவரது தலைக்கு 25 மில்லியன் அமெரிக்க டொலர் சன்மானம் என அறிவிக்கப்பட்டது. நியூயோர்க் வர்த்தகக்கட்டடத் தாக்குதலுக்குப்பின்பு அந்த தொகை இரட்டிப்பாக்கப்பட்டது.

இதனால் சூடானில் தொடர்ந்திருப்பது தனக்கு பாதுகாப்பில்லை எனக்கருதி ஆப்கானிஸ்தானுக்குச் சென்றார். அங்கு தன்னோடு சேர்ந்து ரஷ்யாவுக்கெதிராகப் போராடிய முஜாஹிதீன் குழுக்களில் ஒன்றான முல்லா ஒமரின் தலைமையிலான தாலிபான்களின் ஆட்சி ஒசாமாவுக்கு பாதுகாப்பானதாக இருந்தது.

சூடானிலிருந்து செயற்பட்டு வந்த அல்-கொய்தாவின் நடவடிக்கைகள் அனைத்தும் ஆப்கானிஸ்தானுக்கு மாற்றப்பட்டது. பின்பு “ஏரியானா ஆப்கான் எயார்லைன்” என்னும் விமான நிறுவனத்தை விலைக்கு வாங்கினர்.

உலகின் பல பாகங்களிலிருந்தும் அமெரிக்காவுக்கெதிராக புனித போர்தொடுக்கத் தயாரான இஸ்லாமிய இளைஞர்களை இந்நிறுவனத்தின் விமானம் மூலமாக ஆப்கானிஸ்தானுக்குள் கொண்டு வந்ததுடன், ஆயுதங்களும் கடத்தப்பட்டது.

ரஷ்யப்படைகளை ஆப்கானிஸ்தானிலிருந்து வெளியேற்றுவதற்கு அமெரிக்கா கடுமையான விலை கொடுத்தது. இதற்காக பல பில்லியன் டொலர் பணத்தினைச் செலவழித்திருந்தும், போராளிகள் மூலமாக எந்தவித இலாபத்தையும் அமெரிக்காவினால் அடைய முடியவில்லை.

அப்போதைய சூழ்நிலையில் என்ன விலை கொடுத்தாவது தன்னை விட பலம் வாய்ந்த எதிரியான சோவியத் ரஷ்யா எனும் கொமியுனிச தேசத்தைப் பிளவுபடுத்த வேண்டுமென்று அமெரிக்கா சிந்தித்ததே தவிர, அதற்காக உருவாக்குகின்ற இஸ்லாமிய போராளிகள் பின்னாட்களில் தங்களுக்கெதிராக கிளம்புவார்கள் என்று அமெரிக்கா சிந்திக்கவில்லை. அவ்வாறு சிந்திப்பதற்கு நேரமும் இருக்கவுமில்லை.

அதே போன்று, 15 குடியரசுகளைக்கொண்ட சோவியத் ரஷ்யாவில் ஆறு குடியரசுகளான கசகஸ்தான், தஜிகிஸ்தான், துருக்மேனிஸ்தான், உஸ்பகிஸ்தான், அசர்பைஜான், கிர்கிஸியா ஆகிய தேசங்கள் இஸ்லாமிய குடியரசுகளாகும்.

இந்தக்குடியரசுகளில் சோவியத் ரஷ்யாவின் அணுவாயுதங்கள் உட்பட ஏராளமான நவீன ஆயுதங்கள் களஞ்சியப்படுத்தப்பட்டுள்ளதென்றும், இந்த குடியரசுகள் தனி நாடாகப்பிரிந்தால் அவைகள் பின்னாட்களில் தனது எதிரியான ஈரானுடன் நட்புறவைப்பேணும் என்றும் அமெரிக்கா கணிப்பிடவில்லை.

இந்த ஆறு இஸ்லாமிய குடியரசுகளையும் குறி வைத்து அவைகளை சோவியத்திலிருந்து பிரிப்பதற்கு பாகிஸ்தானின் புலனாய்வுத்துறை மூலமாக அமெரிக்கா பல்வேறு நகர்வுகளை மேற்கொண்டது.

அதற்காக கோடிக்கணக்கில் மொழிபெயர்ப்புடனான அல்-குர்ஆன் பிரதிகளை அந்தந்த தேசங்களின் மொழிகளில் அச்சடித்து அவைகளை அமெரிக்காவின் CIA யினர் பாகிஸ்தானின் உளவு அமைப்பான ISI மூலமாக சோவியத்தின் ஆறு இஸ்லாமிய குடியரசுகளுக்கும் விநியோகம் செய்தனர்.

கொமியுனிச நாடான சோவியத்தில் பகிரங்கமாக மார்க்கக்கடமைகளைச் செய்வதற்கு இருந்த தடைகளை அகற்றி, அங்குள்ள இஸ்லாமியர்களின் உணர்வுகளை சோவியத் ரஷ்யாவுக்கெதிராகத் தூண்டுவதே இதன் நோக்கமாகும்.

அத்துடன், ஆப்கானிஸ்தானில் இஸ்லாமியர்களுக்கெதிராக ரஷ்யப்படைகள் மேற்கொண்டு வந்த படுகொலைகளை அவ்வப்போதே புகைப்பட ஆதாரங்களுடன் இந்த ஆறு குடியரசுகளிலும் விநியோகம் செய்யப்பட்டு அங்குள்ள இஸ்லாமியர்களின் உணர்வுகள் ரஷ்யாவுக்கெதிராக தூண்டப்பட்டது.

சோவியத் அதிபர் கோர்பச்சோவின் ஆட்சியில் 1991 இல் குடியரசுகள் தனிநாடாகப் பிரிந்தது சென்றதுடன், சோவியத் ஒன்றியம் என்ற மாபெரும் வல்லரசு வீழ்சியடைந்தது. இதன் மூலம் அமெரிக்கா தனது இலட்சியத்தை அடைந்தது.

தொடரும்....