Main Menu

பிரதியமைச்சர் ஹரீஸின் பங்கேட்புடன் சாய்ந்தமருது மல்ஹர் சம்ஸ் மகா வித்தியாலய அபிவிருத்தி தொடர்பான கலந்துரையாடல்

இந்த செய்தியைப் பகிர்க >>>

(அகமட் எஸ். முகைடீன்)
சாய்ந்தமருது மல்ஹர் சம்ஸ் மகா வித்தியாலய அபிவிருத்தி தொடர்பான கலந்துரையாடல் கூட்டம் அக்கல்லூரி அதிபர் எம்.எஸ்.எம்.ஐ. மதனி தலைமையில் கடந்த (30) திங்கட்கிழமை மாலை பாடசாலை மண்டபத்தில் நடைபெற்றது.

இந்நிகழ்வில் பாடசாலை சமூகம் சார்பாக அதிபர் விடுத்த அழைப்பையேற்று ஸ்ரீலங்கா முஸ்லிம் காங்கிரஸ் பிரதித்தலைவரும் அரச தொழில் முயற்சி மற்றும் கண்டி நகர அபிவிருத்திப் பிரதியமைச்சருமான சட்டத்தரணி எச்.எம்.எம். ஹரீஸ் கலந்து கொண்டு பாடசாலையின் தேவைப்பாடுகள் தொடர்பில் ஆராய்ந்தார். இதன் போது குறித்த பாடசாலை அபிவிருத்திச்சங்க உறுப்பினர்கள் மற்றும் ஆசிரியர்கள் கலந்து கொண்டனர்.

இக்கல்லூரி மற்றும் இப்பிரதேச அபிவிருத்தி உள்ளிட்ட பல்வேறு விடயங்களில் அமைச்சர் ஹரீஸ் அவ்வப்போது பெரிதும் பங்களிப்புச் செய்து வந்துள்ளார். சமூக நலன் சார்ந்த விடயங்களில் முன்னின்று செயற்படக்கூடிய ஒருவர். எம்மைப் புரிந்து கொண்டவர். அவர் ஆற்றிய நற்பணிகளை நினைவு கூர்ந்து இச்சந்தர்ப்பத்தில் நன்றிகளைத் தெரிவிப்பதாகத் தெரிவித்த கல்லூரி அதிபர் மதனி உள்ளிட்ட ஆசிரியர்கள் பாடசாலையின் தேவைப்பாடுகள் தொடர்பில் பிரதியமைச்சருக்கு எடுத்துக் கூறினர்.

சாய்ந்தமருது மல்ஹர் சம்ஸ் மகா வித்தியாலயத்தை மல்ஹர் சம்ஸ் மகளிர் வித்தியாலயமாக மாற்றஞ்செய்து தருமாறும் குறித்த பாடசாலைக்கு நுழைவாயில் கோபுரம் மற்றும் ஆராதனை மண்டபம் உள்ளிட்ட உள்ளக அபிவிருத்திகளைச் செய்து தருமாறும் ஆசிரியர் பற்றாக்குறையினை நிவர்த்தி செய்யுமாறும் கேட்டுக்கொண்டனர்.

குறித்த அபிவிருத்தி உள்ளிட்ட விடயங்களை கட்டங்கட்டமாக நிறைவு செய்து தருவதாக இதன் போது பிரதியமைச்சர் ஹரீஸ் உறுதியளித்தார்.

இந்த செய்தியைப் பகிர்க >>>


Comments are Closed