Main Menu

மரமோ மயிலோ மக்களை ஏமாற்ற முடியாது : தேசிய காங்கிரஸ் நான்கு ஆசனங்களைப் பெறும் – அதாஉல்லாஹ்

இந்த செய்தியைப் பகிர்க >>>

பாறுக் ஷிஹான்
2020 பொதுத்தேர்தலில் தேசிய காங்கிரஸ் சார்பான திகாமடுல்ல மாவட்ட வேட்பாளரும் சட்டம் ஒழுங்கு அமைச்சின் முன்னாள் மேலதிகச் செயலாளருமான ஏ.எல்.எம்.சலீமின் தேர்தல் பிரசார அலுவலகத்திறப்பு விழா கடந்த ஞாயிற்றுக்கிழமை (28) நடைபெற்றது.

வேட்பாளர் ஏ.எல்.எம்.சலீம் தலைமையில் தேசிய காங்கிரஸ் தேசிய தலைவர் ஏ.எல்.எம்.அதாஉல்லாஹ்வின் பங்குபற்றுதலுடன் இந்நிகழ்வு சிறப்பாக இடம்பெற்றது.

இதன் போது, தேசிய காங்கிரஸ் சார்பான வேட்பாளர்களான சட்டத்தரணி ஏ.எல்.எம்.றிபாஸ், சட்டத்தரணி கே.எல்.சமீம், தொழிலதிபர் ரீ.றஊப், ஆசிய அபிவிருத்தி நிறுவனத்தின் முன்னைநாள் சிரேஷ்ட நிகழ்ச்சித்திட்ட ஆலோசகரும் பிரபல உயர்தர உயிரியல் பாட ஆசிரியருமான எம்.எஸ்.றிஷாத் ஷெரீப், எஸ்.எல்.எம்.பழீல் பீ.ஏ, சட்டத்தரணி எஸ்.எம்.என்.எஸ்.அஹமது மர்ஸூம் மௌலானா ஆகியோர் கலந்து கொண்டனர்.

தேசிய காங்கிரஸ் தேசிய தலைவர் ஏ.எல்.எம்.அதாஉல்லாஹ் தனது கருத்தில், இம்முறை சாய்ந்தமருது மக்களை மாத்திரமன்றி, ஏனைய கிராம மக்களை மரமோ மயிலோ ஏமாற்ற முடியாது. அதனால் இத்தேர்தலில் எமது கட்சி நான்கு ஆசனங்களை அம்பாறை மாவட்டத்தில் பெறுமென்பது எமது நம்பிக்கையாகும். கடந்த காலங்களில் ஜனாசா என்ற சொல்லை வைத்து சுருக்கிட்டுக்கொண்டவர்கள் தற்போது அதில் மாட்டிக்கொண்டு திண்டாடுகிறார்கள். எமது மக்களின் முன் சென்று கதைப்பதற்கு கூட பயப்படுவது மக்களுக்கு கிடைத்த வெற்றி தான் என்றார்.

இந்நிகழ்வில், சாய்ந்தமருது – மாளிகைக்காடு ஜும்ஆப்பள்ளிவாசல் தலைவர் அல்ஹாஜ்.வை.எம்.ஹனீபா, கல்முனை மாநகர சபை உறுப்பினர்கள் உட்பட உலமாக்கள், பள்ளிவாசல் நிருவாகிகள், புத்திஜீவிகள், கல்விமான்கள், மீனவ மற்றும் விவசாய சங்கப்பிரதிநிதிகள் மற்றும் பிரமுகர்கள் அத்துடன் பெருந்திரளான தேசிய காங்கிரஸ் செயற்பாட்டாளர்களும், பொது மக்களும் கலந்து கொண்டனர் என்பது குறிப்பிடத்தக்கது.

இந்த செய்தியைப் பகிர்க >>>


Comments are Closed