Main Menu

தெற்கு பெரும்பான்மையின மக்களோடு மோதும் கருவியாக முஸ்லிம் சமூகத்தினை மாட்டி விடக்கூடாது – எச்.எம்.எம் ஹரீஸ் எம்பி

இந்த செய்தியைப் பகிர்க >>>

(சர்ஜுன் லாபீர்)
முஸ்லிம் சமூகத்தினை சில அரசியல்வாதிகள் தெற்கிலுள்ள பெரும்பான்மை இனத்தோடு மோதவிடுகின்ற ஒரு கருவியாக பயன்படுத்துகின்றார்கள் என முன்னாள் இராஜாங்க அமைச்சரும் பாராளுமன்ற உறுப்பினருமான அல்ஹாஜ் எச்.எம்.எம் ஹரீஸ் தெரிவித்தார்.

சாய்ந்தமருது சஹிரியன் விளையாட்டுக்கழகம் நடாத்திய கெளரவ கலாநிதிப்பட்டம் பெற்றவர்களை கெளரவிக்கும் நிகழ்வு நேற்று (27) சாய்ந்தமருது தனியார் மண்டபத்தில் நடைபெற்றது. இந்நிகழ்வில் பிரதம அதிதியாகக் கலந்து கொண்டு உரையாற்றும் போதே மேற்கண்டவாறு குறிப்பிட்டார்.

அவர் தொடர்ந்து பேசுகையில்,
கிழக்கு மாகாண முஸ்லிம் சமூகம் பாக்குவெட்டியில் அகப்பட்ட பாக்கு போல தேசிய ரீதியான அரசியலில் முகங்கொடுக்க வேண்டியுள்ளது. அதே நேரம், எமது பிராந்திய முஸ்லிம் சமூகத்தின் அரசியல் உரிமையை எங்களுடைய அதிகார மையத்தினைத் தக்க வைக்க வேண்டிய நிலையில் நாங்கள் இருந்து கொண்டிருக்கின்றோம். அதற்கான வழிவகைகளை எங்களது அரசியல் தலைமைகள் செய்யுமென்று நீங்கள் எதிர்பார்க்கின்றீர்கள்.

அதே நேரம், இன்று சம்மாந்துறையில் மறைந்த தலைவரின் நினைவேந்தல் நிகழ்வில் பாராளுமன்ற உறுப்பினர் எம்.ஏ.சுமந்திரன் பேசும் போது, முஸ்லிம் சமூகம் இந்நாட்டில் சுயநிர்ணயப் போராட்டத்தை நடத்த வேண்டுமென்று அரைகூவல் விட்டிருக்கின்றார். அதே சுமந்திரன் முஸ்லிம் சமூகத்தின் முகவெற்றிலையாக இருக்கின்ற கல்முனை நகரினை முஸ்லிம்களுக்கு விட்டுக்கொடுக்க முடியாதென்று கடந்த வருடம் தெளிவாகக் குறிப்பிட்டிருந்தார்.

இவ்வாறு அவர் இரட்டை முகத்தினைக் கொண்டு செயற்படுகின்ற சூழ்நிலையில், இன்னுமின்னும் தெற்கிலுள்ள பெரும்பான்மையின மக்களோடு மோத விடுவதற்கான ஒரு கருவியாக முஸ்லிம் சமூகத்தை மாட்டி விடக்கூடாதென்பதில் நாங்கள் மிகவும் கவனமாக இருக்க வேண்டிய காலமாகும்.

ஏனென்றால், தமிழ் சமூகத்தினுடைய போராட்டத்திற்கு வலிமை சேர்க்கின்ற சக்தியாக பெரும் வல்லரசு நாடான இந்தியா இருக்கின்றது. அண்மையில் இந்திய பிரதமர் மோடியினுடைய உரை கூட தமிழ் தலைமைகளுடைய 13வது திருத்தச்சட்டம் தொடர்பாக பேசியிருக்கின்றார்.

ஆனால், முஸ்லிம் சமூகத்தின் ஜனாஸா எரிக்கப்பட்ட விடயத்தில் கூட எந்தவொரு வடகிழக்கிலுள்ள தலைமைகளோ, வல்லரசுகளோ குரல் கொடுக்கவில்லை என்பதன் மூலம் நாங்கள் புரிந்து கொள்ள வேண்டும்.

எமது சமூகத்தை மிகவும் நுட்பமாக அடுத்த கட்டத்திற்கு கொண்டு செல்ல வேண்டிய பொறுப்பு எமது சமூகத்தின் பாராளுமன்ற உறுப்பினர்களுக்கு மட்டும்மன்றி, ஒவ்வொரு சமூக ஆர்வலர்களுக்கும் உண்டெனக் குறிப்பிட்டார்.

இந்நிகழ்வில், கல்முனை மாநகர சபை உறுப்பினர்கள், பிரதேச சபை உறுப்பினர்கள், சட்டத்தரணிகள் கல்வியாளர்கள், சமூக அமைப்புகளின் தலைவர்கள் எனப்பலரும் கொண்டனர்.

இந்த செய்தியைப் பகிர்க >>>


Comments are Closed