Main Menu

உரைகள்

இழிவான அரசியல்வாதிகளே இனத்துவேஷத்தையும் வெறுப்புணர்வையும் ஏற்படுத்துகின்றனர் -இராஜாங்க அமைச்சர் மௌலானா காட்டம்

எஸ்.ரி.அக்ஷயா நடந்து முடிந்த வெறுக்கத்தக்க சம்பவங்களால் நாடே சோபை இழந்து நிற்கும் போது, ஒரு சில காழ்ப்புணர்ச்சியுள்ள இழி நிலை அரசியல்வாதிகளே இன்னுமின்னும் இனத்துவேஷத்தையும் வெறுப்புணர்வையும் ஏற்படுத்திக் கொண்டிருப்பதாக சமூக வலுவூட்டல் இராஜாங்க அமைச்சர் அலிஸாஹிர் மௌலானா ஆதங்கம் வெளியிட்டார்.

ஏறாவூர் நகர பிரதேச செயலகத்தின் ஒருங்கிணைப்புக் குழுக்கூட்டம் இன்று செவ்வாய்க்கிழமை (28.05.2019) பிரதேச செயலாளர் வெள்ளக்குட்டி யூசுப் தலைமையில் ஏறாவூர் நகர பிரதேச செயலக கேட்போர் கூடத்தில் இடம்பெற்றது.

கூட்டுத்தாபன, திணைக்கள அதிகாரிகள், உள்ளூராட்சி மன்றப்பிரதிநிதிகள், அரசாங்க அலுவலர்கள் ஆகியோர் கலந்து கொண்ட இந்நிகழ்வில், பிரதேச அவிபிருத்தித்திட்டங்கள், மக்களின் பாதுகாப்பும் இயல்பு வாழ்க்கையும் உள்ளிட்ட பல்வேறு விடயங்கள் பற்றித்தெளிவுபடுத்தப்பட்டன.

அங்கு தொடர்ந்து உரையாற்றிய மாவட்ட இணைப்புக்குழு இணைத்தலைவரும் இராஜாங்க அமைச்சருமான அலி ஸாஹிர் மௌலானா, நாட்டில் சமீபத்தில் இடம்பெற்ற அசம்பாவித சம்பவங்களைத்தொடர்ந்து நாடு செயலிழந்து தற்போதைக்கு மீண்டும் உயிர் மூச்செடுத்துக் கொண்டிருக்கும் நிலையில், ஒரு சில கீழ்த்தரமான மனோநிலை கொண்ட காழ்ப்புணர்ச்சி அரசியல்வாதிகளின் செயற்பாடுகள் எரிந்து கொண்டிருக்கும் தீயில் மேலும் எண்ணெய் வார்ப்பதாய் அமைந்திருக்கிறது. இது வெறுக்கத்தக்கதும் கண்டிக்கத்தக்கதுமான செயலாகும்.

கடந்த 30 வருட கால ஆயத வன்முறைகளின் துயரம் எப்படிப்பட்டது என்பதை நாம் அனுபவித்து, அதில் பல்வேறு வகையான இழப்புக்களையும் சந்தித்து, மீளாத்துயரிலிருந்து மீண்டெழுந்து கொண்டிருக்கின்ற நிலையிலே சமீபத்தில் மீண்டுமொரு துயரம் நம்மை சோகத்தில் ஆழ்த்தி விட்டுச் சென்றிருக்கின்றது.

இந்நிலையிலிருந்து விடுபட நல்லுள்ளம் கொண்ட அனைவரும் இன, மத பேதமின்றி நடுநிலையாக நின்று நிலைமகளைச் சீர்செய்து கொண்டிருக்கின்றார்கள். அதனை நாம் பெருமையுடன் வரவேற்கின்றோம்.

அதே வேளை, இந்த ஒட்டு மொத்த நாட்டுக்குமே அழிவைத்தரக்கூடிய நிலையில் சில இனவாத அரசியல்வாதிகளும், வெளிநாட்டு சக்திகளும் நடந்த சம்பவங்களை இனவெறுப்புக்குரியதாக மாற்றிக் கொண்டிருக்கின்றார்கள்.

எனவே, சமூக சகவாழ்வையும் இன சௌஜன்யத்தையும் இந்நாட்டு நலனையும் விரும்பும் எவரும் இந்த விடயத்தில் மிக எச்சரிக்கையாக இருக்க வேண்டும்.

இனங்களைப்பிரித்து நாட்டை அழிவுக்கு இட்டுச்செல்லும் நடவடிக்கைகளுக்கு ஒரு போதும் இடமளிக்கக்கூடாது. மனித உரிமைகளை மணி மகுடம் போல் காத்து மக்களுக்கிடையில் இன, மத பேதமின்றி சக வாழ்வை புத்துயிர் பெறச்செய்ய வேண்டும்.

ஒரு சிறு கும்பலின் செயலால் இப்பொழுது இந்நாட்டின் ஒட்டு மொத்த முஸ்லிம் சமுதாயமும் பல இன்னல்களுக்கு முகங்கொடுக்க வேண்டியேற்பட்டுள்ளது.

எனவே, இந்நிலைமையை மாற்றியமைக்க வேண்டும். இன, மதவாதிகளுக்கு இனி மேல் இந்நாட்டில் குழப்பங்களைத் தோற்றுவிக்க முடியாதென்ற நிலையை உறுதிப்படுத்த வேண்டும்.” என்றார்.