வைத்தியக் கட்டுரைகள்

புற்றுநோயை ஆரம்பத்திலேயே கண்டறிதலும் முதன்மை நிலைத்தடுத்தலும் -தொடர் -1

முஹம்மது ஸில்மி (வைத்திய மாணவன்- கிழக்கு பல்கலைக்கழகம்) நமது வாழ்க்கையை ஆரோக்கியமானதாக அமைத்துக்கொள்வதன் மூலமும், நாம் வாழும் சூழலைச் சுத்தமாக வைத்துக்கொள்வதன் மூலமும் மூன்றிலொரு விதமான புற்றுநோய்கள் - வராமல் பாதுகாத்துக் கொள்ள முடியும்.

1. புகைத்தலை முற்றாகத் தவிர்க்கவும் (சுயமாகப்புகைத்தல், மற்றவர்கள் விடும் புகையைச் சுவாசித்தல்) 2. புகையிலை, வெற்றிலை மெல்லுதல், பாக்கு மற்றும் வணிக ரீதியான பாக்குத் தயாரிப்புப்பொருட்களை முற்றாகத் தவிர்க்கவும், 3. மதுபானத்தைத் தவிர்க்கவும். 4. சமச்சீரான உணவுப்பழக்கத்துடன் அதிகளவில் பழங்கள், காய்கறிகள் மற்றும் பச்சைக்கீரை வகைகளை அதிகளவில் உட்கொள்ளுங்கள். 5. உங்கள் உயரத்திற்கேற்ற எடையைப் பராமரிக்க முயலுங்கள். 6. பாதுகாப்பற்ற உடலுறவை முற்றாகத்தவிர்க்கவும் . 7. தொடர்ச்சியாக உடற்பயிற்சிகளை மேற்கொள்ளுங்கள். 8. மன இறுக்கத்தைக் குறைக்கும் வழிகளைக் கைக்கொள்ளுங்கள். 9. வாழும் சூழலைச் சுத்தமாகவும் ஆரோக்கியமாகவும் வைத்திருங்கள். 10. வேலைத்தளத்தில் புற்றுநோயை உண்டாக்கக்கூடிய பொருட்களின் வெளிக்காட்டுதல்களைத் தவிர்த்துக் கொள்ளுங்கள்.

மற்றொரு மூன்றிலொரு வீதமான புற்றுநோய்கள், ஆரம்பத்தில் கண்டுபிடிக்கப்பட்டால், வெற்றிகரமாகச் சிகிச்சையளிக்க முடியும். எனவே, புற்றுநோய்கள் பற்றிய ஆபத்தான அறிகுறிகள் பற்றிய அறிவு பொது மக்களை விழிப்புடன் வைத்திருக்க உதவும்.

புற்றுநோய் தொடர்புடைய அறிகுறிகள் மற்றும் குணங்குறிகளுக்கு புற்றுநோய் மட்டுமே காரணமில்லை. காணப்படும் அறிகுறிகள், குணங்குறிகளை மட்டும் மூலமாக வைத்துக்கொண்டு, ஏற்பட்டிருப்பது புற்றுநோய் என்கின்ற முடிவுக்கு வர முடியாது.

பூரணமான உடற்பரிசோதனை, சிறப்புப்பரிசோதனைகள் (உதாரணமாக, மார்பகக் கதிர்ப்பரிசோதனை, நுண் ஊசி மூலம் இழையவியல் பரிசோதனை, சந்தேகத்திற்கிடமான இடத்தில் இழையங்களை வெட்டியெடுத்துப் பரிசோதித்தல், குழாயொன்றை உள்நோக்கிச் செலுத்துவதன் மூலம் ஆய்வது போன்ற பல பரிசோதனைகளை புற்றுநோயைக்கண்டறிய முன்னர் செய்ய வேண்டியுள்ளது.

சந்தேகத்திற்கிடமான அறிகுறிகள் மற்றும் குணங்குறிகள் ஒருவரிடமிருந்தால், தாமதமில்லாமல் அந்நபரை ஒரு மருத்துவரிடம் அனுப்பி வைக்க வேண்டும்.

(தொடரும்...)