Main Menu

சர்வதேசம்

இந்தியா-சீனாவுக்கிடையில் திடீர் போர் பதற்றம் : பின்னணி என்ன?

முகம்மத் இக்பால் - சாய்ந்தமருது இந்தியா-சீனாவுகளுக்கிடையில் போர் பதற்றம் அதிகரித்துள்ளதனால், உலகத்தின் கவனம் லடாக் எல்லையை நோக்கி திரும்பியுள்ளது.

உலகிலுள்ள நாடுகளின் எல்லைகள் இயற்கையாக உருவானதல்ல. அது மனிதர்களால் உருவாக்கப்பட்டது. சில நாடுகளுக்கிடையில் கடல் எல்லைகளைப் பகிர்ந்து கொள்வதிலேயே பிரச்சினைகள் இருக்கின்ற போது, நிலத்தினை எல்லைகளாகக் கொண்ட நாடுகளுக்கிடையில் எல்லைப் பிரச்சினையில்லாமல் இருக்குமா? ஏதோவொரு வகையில் பிரச்சினைகள் தோன்றுவது வழமை.

அது போலவே சீனா - இந்தியா ஆகிய நாடுகளுக்கிடையில் பல தசாப்தங்களாக இருந்து வருகின்ற எல்லைப் பிரச்சினையும், அதனால் ஏற்பட்ட யுத்தங்கள் பற்றியும் நாங்கள் அறிந்துள்ளோம். ஆனால், இவ்வளவு காலமும் முடங்கிக்கிடந்த இந்த எல்லைப் பிரச்சினையானது, தற்போது கொரோனா வைரசின் தாக்கத்திலிருந்து இரு நாடுகளும் விடுபடாத நிலையில், திடீரென இந்த எல்லைப்பிரச்சினை விஸ்பரூபமெடுத்ததற்கான காரணம் என்ன?

இந்தியாவும், சீனாவும் தங்களது நாடுகளின் எல்லைகளில் படைகளையும், நவீன ஆயுதங்களையும் குவித்து வருவதாகவே ஊடகங்கள் செய்திகளை வெளியிடுகின்றன. ஆனால், இந்த திடீர் பதற்றம் அதிகரித்ததற்கான காரணமென்னவென யாரும் கூறியதாகத் தெரியவில்லை.

உலக நாடுகளுக்கிடையில் நடைபெறுகின்ற யுத்தங்கள் அனைத்திலும் பொருளாதார நலன்கள் முதன்மை வகிக்கின்றது. இலாபமில்லாமல் எந்தவொரு நாடுகளும் யுத்தம் செய்வதில்லை. அது போலவே, இலாபத்தை நோக்கமாகக் கொண்டது தான் இந்தப்பிரச்சினையாகும்.

உலகின் பல முன்னணி நிறுவனங்கள் சீனாவில் முதலீடுகளைச் செய்துள்ளது. அங்கு ஏற்பட்ட கொரோனா வைரசின் தாக்கத்தினால் சீனா மட்டுமல்லாது, உலகமே முடங்கி விட்டது. இதனால் அமெரிக்கா போன்ற நாடுகள் சீனாவுக்கெதிராக கிளம்பியுள்ளன.

இந்தச்சந்தர்ப்பத்தில் சீனாவில் முதலீடுகளைச் செய்துள்ள மேற்கு நாடுகளின் நிறுவனங்களை வளைத்துப் போட்டு அவர்களை இந்தியாவுக்கு வரும்படியும், அங்கு தங்களது முதலீடுகளைச் செய்யும் படியும் அழைப்பு விடுத்துள்ள,மை இந்தியா. இது சீனாவுக்கு கடுப்பினை ஏற்படுத்தியுள்ளது.

இதனால் தனது நாட்டிலுள்ள முதலீட்டாளர்களை இந்தியாவுக்குச் செல்லாது தடுப்பதற்காக இந்தியா ஓர் பாதுகாப்பற்ற நாடு என்று காண்பிக்கும் தேவை சீனாவுக்குள்ளது. இதனாலேயே சீனா வலிந்து இந்தியாவை வம்புககிழுத்து அச்சுறுத்துகின்றது.

இதற்கிடையில் உலகின் ஒவ்வொரு மூலையிலும் மூக்கை நுழைக்கும் அமெரிக்கா இந்த விவகாரத்தில் சீனாவைப் பழிவாங்க சந்தர்ப்பமாக பாவிக்கின்றது. அதனால் இந்தியாவுக்கு ஆதரவு வழங்குவதாக அறிவித்துள்ளது.

ஆனால், எது எப்படியிருப்பினும் யுத்தமொன்று ஏற்பட்டால் அதில் இராணுவத்தினர்களை விட பொதுமக்களே அதிகமாகக் கொல்லப்படுவார்கள். எனவே, இந்தியா-சீனா ஆகிய நாடுகளுக்கிடையில் யுத்தம் ஏற்படாமல் அது பேச்சுவார்த்தைகள் மூலமாக தீர்க்கப்படல் வேண்டுமென்பது தான் எமது எதிர்பார்ப்பாகும்.