Main Menu

Uncategorized

முல்லைத்தீவு ஊடகவியலாளர்கள் மீதான தாக்குதல் ஜனநாயகத்தைக் கேள்விக்குறியாக்கும் – கண்டன அறிக்கையில் சிலோன் மீடியா போரம்.

(எஸ்.அஷ்ரப்கான்) முல்லைத்தீவுப் பகுதியில் சட்டவிரோத மரக்கடத்தல் தொடர்பான செய்தி சேகரிக்கச் சென்ற ஊடகவியலாளர்கள் தாக்கப்பட்டு, அவர்களது ஊடக உபகரணங்கள் பறிக்கப்பட்டதை வன்மையாகக் கண்டித்து சிலோன் மீடியா போரம் இன்று (13) கண்டன அறிக்கையொன்றை வெளியிட்டுள்ளது.

இதேவேளை, சம்பவம் தொடர்பில் ஊடகவியலாளர்களைத் தாக்கிய கும்பலைக் கைது செய்து, சட்டத்தின் முன் நிறுத்தி குறித்த ஊடகவியலாளருக்கான நியாயத்தைப் பெற்றுக்கொடுக்குமாறு பொலிஸ் மாஅதிபருக்கு கடிதமொன்றையும் அனுப்பி வைத்துள்ளது.

சிலோன் மீடியா போரத்தின் தலைவர் கலாநிதி றியாத் ஏ.மஜீத் மற்றும் பொதுச்செயலாளர் ஏ.எஸ்.எம்.முஜாஹித் ஆகியோர் ஒப்பமிட்டு குறித்த கடிதத்தை அனுப்பி வைத்துள்ளனர்.

அக்கடிதத்தில் மேலும் தெரிவிக்கப் பட்டிருப்பதானது,

நாட்டில் நடக்கும் குற்றச்செயல்கள், அபிவிருத்தி மற்றும் இன்னோரன்ன செய்திகளை சமூகத்திற்கும் மக்களுக்கும் வெளிக்கொண்டு வர வேண்டிய பொறுப்பு வாய்ந்த பணியை பல்வேறு சவால்களுக்கு மத்தியில் ஊடகவியலாளர்கள் மேற்கொண்டு வருகின்றனர்.

உண்மைகளை வெளியே கொண்டு வருவதற்காக அர்ப்பணிப்புடன் உயிராபத்தைக்கூடப் பொறுப்படுத்தாது செயற்பட்ட ஊடகவியலாளர்களான தவசீலன் மற்றும் குமணன் ஆகியோரின் தைரியத்தைப் பாராட்டுவதோடு, ஊடகவியலாளர்கள் தாக்கப்பட்டு அவமதிக்கப்படுகின்ற இச்செயற்பாடுகளைத் தொடர விட முடியாது.

ஊடகவியலாளர்கள் மீது இவ்வாறான கோழைத்தனமான தாக்குதல் மேற்கொள்வதானது ஜனநாயகத்தை கேள்விக்குறியாக்கும் செயலாகும்.

ஊடகவியலாளர்களின் கடமைகளுக்கு பங்கம் ஏற்படுத்தி உண்மைகளை மூடி மறைத்து ஊடகவியலாளர்களை ஊமையாக்கும் இந்நடவடிக்கையினை அனுமதிக்க முடியாது.

இவ்வாறான தாக்குதல்களில் ஈடுபடுவோரை எதுவித தயவு தாட்சண்யம், அந்தஸ்து பாராது சட்டத்தின் முன் நிறுத்த வேண்டிய தார்மீகப் பொறுப்பு அரசாங்கத்திடம் காணப்படுவதாகவும் சுட்டிக்காட்டப்பட்டுள்ளது.

நாட்டின் ஜனாதிபதி கோட்டபாய ராஜபக்ஷ மற்றும் இந்த அரசாங்கம் நாட்டில் இடம்பெறும் அனைத்து குற்றச்செயல்களையும் தடுத்து நிறுத்த பல்வேறு பிரயத்தனங்களை மேற்கொண்டு வரும் நிலையில், அதற்கு ஒத்தாசை வழங்கி அரசின் செயற்பாடுகளை வெளிக்கொண்டு வர உழைக்கும் ஊடகவியலாளர்கள் தாக்கப்படுவது வேதனையளிப்பதாகவும் குறிப்பிடப்பட்டுள்ளது.