Main Menu

Uncategorized

முஸ்லிம் பிரதிநிதித்துவத்தைப் பாதுகாக்கும் சுபையிரின் முயற்சி வீண் போகாது: அலி சாஹிர் மெளலானா

(எஸ்.அஷ்ரப்கான்) மட்டக்களப்பு மாவட்டத்தில் முஸ்லிம் பிரதிநிதித்துவத்தைப் பாதுகாக்கும் பொருட்டு, கட்சி வேறுபாடுகளைக் களைந்து செயற்படுவதற்கு முன்வந்துள்ள கிழக்கு மாகாண அமைச்சர் சுபையிரை மட்டு. மாவட்ட முஸ்லிம் சமூகம் ஒரு போதும் மறவாது என முன்னாள் இராஜாங்க அமைச்சர் அலி சாஹிர் மெளலானா தெரிவித்தார்.

ஏறாவூர் ஐயங்கேணி பிரதேசத்தில் இடம்பெற்ற ஸ்ரீலங்கா சுதந்திரக்கட்சியின் வட்டாரக்குழுக் கூட்டத்தில் கலந்து கொண்டு உரையாற்றிய போதே அவர் மேற்கண்டவாறு தெரிவித்தார்.

அவர் தொடர்ந்தும் தெரிவிக்கையில், இம்முறை நடைபெறப்போகின்ற பாராளுமன்றத்தேர்தல் ஒரு வராலாற்று முக்கியத்துவமிக்க தேர்தலாகும். இக்கால கட்டத்தில் மட்டு.மாவட்டத்திலுள்ள முஸ்லிம் அரசியல் தலைவர்கள் பிரிந்து நின்று செயற்படுவதனால் முஸ்லிம் பிரதிநிதித்துவத்தைப் பெறுவது சவாலான விடயமாகும். இவ்வாறானதொரு சூழ்நிலையில், முன்னாள் மாகாண அமைச்சர் சுபையிர் கட்சி வேறுபாடுகளைக்களைந்து முஸ்லிம் பிரதிநிதித்துவத்தைப் பாதுகாப்பதற்கு முன்வந்துள்ளமை பாராட்டத்தக்க விடயமாகும்.

முன்னாள் அமைச்சர் சுபையிர் ஸ்ரீலங்கா சுதந்திரக்கட்சியின் மாவட்டத்தலைவராக இருந்து கொண்டு, அக்கட்சியின் அனுமதியோடு, இத்தேர்தலில் அவர் மேற்கொண்ட முடிவினால் முஸ்லிம் சமூகத்தின் மத்தியில் நன்மதிப்பினைப் பெற்றுள்ளார். நிச்சயமாக அவருடைய பெயர் வரலாற்றில் தடம் பதிக்கும். குறிப்பாக, மட்டு.மாவட்ட முஸ்லிம் சமூகம் அவரை ஒரு போதும் மறந்து விட முடியாது.

குறித்த பொதுத்தேர்தலில் தனக்கு ஆதரவு வழங்கும்படி நான் முன்னாள் அமைச்சர் சுபையிரிடம் வேண்டிக்கொண்டதற்கிணங்க, அவர் எனது கோரிக்கைகளை மதித்து எனது வெற்றிக்காக உழைப்பதற்கு முன்வந்துள்ளார். விசேடமாக அவருக்கு எனது நன்றியினைத் தெரிவித்துக்கொள்கின்றேன்.

குறிப்பாக, அவர் சுதந்திரக்கட்சியாக இருந்தாலும் சமூக நலன்கருதி தூரநோக்குடன் சிந்திக்கின்ற ஒரு இளம் அரசியல் தலைவராக அடையாளம் காணப்பட்டுள்ளார்.

முன்னாள் அமைச்சர் சுபையிர் தனது குறுகிய கால அரசியல் வாழ்வில் மட்டக்களப்பு மாவட்டத்தில் பாரிய அபிவிருத்திப்பணிகளைச் செய்து மக்கள் மனங்களில் இடம்பிடித்துள்ளார். அவருடைய ஆதரவினையும் பெற்று நான் அமோக வாக்குகளினால் வெற்றி பெறுவது உறுதியாகும். ஆகவே, முஸ்லிம் பிரதிநிதித்துவத்தை பாதுகாக்கும் சுபையிரின் முயற்சி ஒரு போதும் வீண் போகாதெனவும் அவர் மேலும் தெரிவித்தார்.

ஸ்ரீலங்கா சுதந்திரக்கட்சியின் ஏறாவூர் ஐயங்கேணி வட்டாரத்தலைவர் முஹம்மட் நிப்ராஸ் தலைமையில் இடம்பெற்ற இக்கூட்டத்தில், கிழக்கு மாகாண முன்னாள் அமைச்சரும், ஸ்ரீ.ல.சு.கட்சியின் மட்டு.மாவட்ட தலைவருமான எம்.எஸ்.சுபையிர், ஸ்ரீ.ல.சு.கட்சியின் மாவட்ட அமைப்பளார்களான எஸ்.எம்.எம்.அறூஸ் மற்றும் ஏ.எம்.மாஹிர் உள்ளிட்ட பலர் கலந்து கொண்டனர்.